|
27 лістапада 2007 года а 19-й гадзіне ў Вялікай актавай
зале філалагічнага факультэта БДУ адбылося мерапрыемства кафедры тэорыі
літаратуры, вучэбна-навуковай лабараторыі беларускага фальклору і аддзела
народных мастацкіх рамёстваў і фальклору Нацыянальнага цэнтра мастацкай
творчасці дзяцей і моладзі - фальклорная вечарына "Краскі Палесся".
Праграма вечарыны ўключала дзве
часткі. Першая была прысвечана прэзентацыі 4 выпуска зборніка навуковых
артыкулаў "Фалькларыстычныя даследаванні: Кантэкст. Тыпалогія. Сувязі".
З гэтай нагоды вечарыну адкрыў доктар філалагічных навук, прафесар, загадчык
кафедры тэорыі літаратуры БДУ Вячаслаў Пятровіч Рагойша. Пра гісторыю выдання
зборніка навуковых артыкулаў паведаміла Рыма Мадэстаўна Кавалёва, навуковы
рэдактар гэтага выдання. У прыватнасці, яна адзначыла, што зборнік не адразу
атрымаў такую назву. Напачатку выкладчыкам фальклору філалагічнага факультэта
прыйшла ідэя арганізоўваць і праводзіць навуковыя фалькларыстычныя чытанні ў
гонар Рыгора Шырмы. Першыя такія Чытанні прайшлі ў лістападзе 1999 года.
Вынікам працы на Чытаннях стаў невялікі - 8 аўтараў - зборнік пад назвай "Восточнославянский фольклор:
поиски новых подходов". Заўважыўшы цікавасць студэнтаў да навуковай
фалькларыстычнай работы, вопыт Шырмаўскіх чытанняў было вырашана працягнуць і
зрабіць іх рэгулярнымі, з абавязковым выданнем зборніка навуковых артыкулаў. У
2001 годзе так выйшаў з друку "Свет славянскага фальклору", у 2002 годзе -
"Даследаванні па тэорыі літаратуры і славянскай фалькларыстыцы". І толькі ў
2004 годзе з'явіўся першы выпуск пад назвай "Фалькларыстычныя даследаванні:
Кантэкст. Тыпалогія. Сувязі".
Лёс выдання няпросты: ён
выходзіць за кошт саміх аўтараў. Артыкулы, змешчаныя тут, адрозніваюцца
арыгінальнасцю думак, падыходаў да аналізу фалькллрнай спадчыны беларускага і
іншых народаў. З кожным годам спектр пытанняў зборніка павялічваецца, што можна
назіраць па тэматычных раздзелах.
Асноўны напрамак дадзенага
выдання - падтрымка творчай навуковай моладзі, якая цікавіцца нацыянальнай
спадчынай нашага і іншых народаў, дапамога ў ажыццяўленні іх памкненняў. Вельмі
прыемна, што ў зборніку друкуюцца не толькі студэнты фіалагічнага факультэта
БДУ, але і студэнты ГДУ імя Ф. Скарыны, і студэнты БДПУ імя М. Танка.
Запрашаем усіх зацікаўленых далучацца да нашай працы.
Другая частка вечарыны была
канцэртная. У праграме канцэрта бралі ўдзел:
- І. В. Пішчыкаў,
выкладчык, канцантмайстар, гарманіст, які выканаў на гармоніку "Лядзецкую польку".
- Фальклорны гурт БДУ "Тутэйшая
шляхта" (мастацкі кіраўнік - к.хім.н. Лявон Махнач).
Два дзіцячыя мастацкія фальклорныя
калектывы:
- "Зовзулэнька" Мяднянскай сярэдняй школы
Брэсцкага раёна (мастацкі кіраўнік Яўгенія Бараноўская);
- "Рудабельскія зорачкі" сярэдняй школы №3
г/п Акцябрскі Акцябрскага раёна Гомельская вобласці (мастацкі кіраўнік
Вольга Дульская).
З заключным словам выступіў Аляксей
Эдуардавіч Галіч, метадыст аддзела народных мастацкіх рамёстваў і фальклору
Нацыянальнага цэнтра мастацкай творчасці дзяцей і моладзі. Ён адзначыў, што
задача пазашкольнага выхавання і адукацыі ў асяроддзі школьнікаў на сённяшні
дзень - знаходзіць і пераймаць ад прадзедаў традыцыю аўтэнтычнага выканання
беларускіх спеваў, танцаў, гульняў, папулярызаваць менавіта гэтую, нацыянальна
адметную традыцыю, не даваць забыцца пра нашы карані. Задача гэта паспяхова
вырашаецца, хаця і не ў тых маштабах, у якіх бы хацелася, дзякуючы
зацікаўленасці найперш выкладчыкаў агульнаадукацыйных школ і спецыялістаў па
пазашкольным выхаванні дзяцей і моладзі.
На гэтым метапрыемства было скончана.
Але не можа закончыцца прыцяжэнне да роднай песні, жаданне чуць яе чароўны і
такі дарагі спеў.
Таццяна
Марозава, загадчык
вучэбна-навуковай лабараторыі беларускага
фальклору БДУ , к.ф.н., дацэнт, адказны
арганізатар мерапрыемства.
|
Беларуская
Главная 
